ماہان سے روایت ہے کہ ایک گروہ نبی کریم صلی اللہ علیہ وسلم کی بارگاہ میں حاضر ہوا اور عرض گزار ہوا: ”بے شک ہم سے بڑے بڑے گناہ سرزد ہو گئے ہیں“، راوی کہتے ہیں کہ میرا نہیں خیال کہ آپ صلی اللہ علیہ وسلم نے انہیں (فوری طور پر) کوئی جواب دیا، پھر جب وہ پیٹھ پھیر کر جانے لگے تو یہ آیتِ مبارکہ نازل ہوئی: ﴿وَإِذَا جَاءَكَ الَّذِينَ يُؤْمِنُونَ بِآيَاتِنَا فَقُلْ سَلَامٌ عَلَيْكُمْ كَتَبَ رَبُّكُمْ عَلَى نَفْسِهِ الرَّحْمَةَ﴾ [سورة الأنعام: 54] ”اور جب آپ کے پاس وہ لوگ آئیں جو ہماری آیات پر ایمان لاتے ہیں تو (ان سے) کہہ دیجیے کہ تم پر سلامتی ہو، تمہارے رب نے اپنی ذاتِ اقدس پر رحمت کو لازم فرما لیا ہے“، چناچہ نبی کریم صلی اللہ علیہ وسلم نے انہیں واپس بلوایا اور ان کے سامنے اس آیتِ کریمہ کی تلاوت فرمائی۔
اسے امام مسدد نے اپنی مسند میں روایت کیا ہے۔ [المطالب العالية بزوائد المسانيد الثمانية/كتاب التفسير/حدیث: 3599]