عقبہ بن صہبان الہنائی سے روایت ہے کہ میں نے ام المومنین سیدہ عائشہ رضی اللہ عنہا سے اللہ عزوجل کے اس فرمان ﴿ثُمَّ أَوْرَثْنَا الْكِتَابَ الَّذِينَ اصْطَفَيْنَا مِنْ عِبَادِنَا﴾ [سورة فاطر: 32] کے متعلق دریافت کیا، تو انہوں نے مجھ سے فرمایا: ”اے میرے پیارے بیٹے! یہ سب کے سب (تینوں گروہ) جنتی ہیں، رہے نیکیوں میں سبقت لے جانے والے (السابق بالخيرات)، تو یہ وہ نفوسِ قدسیہ ہیں جو رسول اللہ صلی اللہ علیہ وسلم کے عہدِ مبارک میں دنیا سے رخصت ہوئے اور رسول اللہ صلی اللہ علیہ وسلم نے ان کے حق میں (جنت کی) زندگی اور رزق کی گواہی دی، اور رہے میانہ روی اختیار کرنے والے (المقتصد)، تو یہ وہ صحابہ کرام ہیں جنہوں نے آپ صلی اللہ علیہ وسلم کے نقشِ قدم کی کامل پیروی کی یہاں تک کہ وہ آپ سے جا ملے، اور رہا اپنی جان پر ظلم کرنے والا (الظالم لنفسه)، تو وہ مجھ جیسے اور تم جیسے لوگ ہیں۔“ عقبہ کہتے ہیں کہ سیدہ عائشہ رضی اللہ عنہا نے (کمالِ تواضع اور انکساری سے) اپنے آپ کو ہمارے ساتھ (تیسری قسم میں) شمار کیا۔
امام ابو داؤد رحمہ اللہ فرماتے ہیں کہ ہمیں صلت بن دینار ابو شعیب نے عقبہ بن صہبان الہنائی کے واسطے سے یہ حدیث بیان کی۔ [المطالب العالية بزوائد المسانيد الثمانية/كتاب التفسير/حدیث: 3688]