سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم ایک صبح تشریف لائے اور ارشاد فرمایا: ”میں نے آج نمازِ فجر سے پہلے (خواب میں) دیکھا کہ گویا مجھے «الْمَقَالِيدَ» ”چابیاں“ اور «الْمَوَازِينَ» ”ترازو“ عطا کیے گئے ہیں۔ رہے «الْمَقَالِيدُ» تو ان سے مراد یہی کنجیاں ہیں، اور رہے «الْمَوَازِينُ» تو یہ وہ ترازو ہیں جن سے وزن کیا جاتا ہے۔ چنانچہ مجھے ترازو کے ایک پلڑے میں رکھا گیا اور میری پوری امت کو دوسرے پلڑے میں رکھا گیا، تو میرا وزن کیا گیا اور میں اپنی امت پر بھاری رہا۔ پھر سیدنا ابوبکر رضی اللہ عنہ کو لایا گیا اور ان کا وزن کیا گیا تو وہ بھی ان سب پر بھاری رہے، پھر سیدنا عمر رضی اللہ عنہ کو لایا گیا اور ان کا وزن کیا گیا تو وہ بھی ان سب پر بھاری رہے، پھر سیدنا عثمان رضی اللہ عنہ کو لایا گیا اور ان کا وزن کیا گیا تو وہ بھی ان سب پر بھاری ثابت ہوئے، پھر میں بیدار ہو گیا اور وہ (ترازو و چابیاں) اٹھا لیے گئے۔“
اس حدیث کو امام احمد نے اپنی مسند (5361) اور امام بزار نے (2460) میں روایت کیا ہے، اور اس کی سند حسن درجے کی ہے۔ [المطالب العالية بزوائد المسانيد الثمانية/كتاب المناقب/حدیث: 3806]