سیدنا عبداللہ بن عباس رضی اللہ عنہما سے روایت ہے کہ بے شک قریش (کا نور) حضرت آدم علیہ السلام کی تخلیق سے دو ہزار سال قبل اللہ عزوجل کے حضور ایک نور کی صورت میں موجود تھا، وہ نور اللہ کی تسبیح بیان کرتا تھا تو فرشتے بھی اس کی تسبیح کی وجہ سے تسبیح کرتے تھے، پھر جب اللہ تعالیٰ نے حضرت آدم علیہ السلام کو پیدا فرمایا تو اس نور کو ان کی پشت میں ودیعت کر دیا، رسول اللہ صلی اللہ علیہ وسلم نے ارشاد فرمایا: ”پھر اللہ تعالیٰ نے اسے حضرت آدم علیہ السلام کی صلب میں زمین پر اتارا، پھر اسے کشتی میں حضرت نوح علیہ السلام کی صلب میں رکھا، اور حضرت ابراہیم علیہ السلام کی صلب میں (نمرود کی) آگ میں ڈالا گیا، اور اللہ عزوجل مجھے مسلسل معزز پشتوں سے پاکیزہ رحموں کی طرف منتقل فرماتا رہا، یہاں تک کہ مجھے میرے والدین کے ذریعے (دنیا میں) ظاہر فرمایا، وہ کبھی بھی کسی بدکاری یا غیر شرعی فعل پر اکٹھے نہیں ہوئے تھے۔“
اس حدیث کی سند میں عثمان بن ضحاک نامی راوی سخت ضعیف اور متروک ہے، اسی بنا پر امام ابن جوزی اور علامہ البانی سمیت دیگر کئی محدثین نے اسے موضوع (من گھڑت) احادیث کی فہرست میں شامل کیا ہے۔ [المطالب العالية بزوائد المسانيد الثمانية/كتاب السيرة والمغازي/حدیث: 4209]