سیدنا جابر رضی اللہ عنہ سے روایت ہے کہ سیدنا عمر رضی اللہ عنہ کے قبولِ اسلام کا واقعہ کچھ یوں ہے کہ انہوں نے بیان کیا: ”ایک رات میری بہن کو زچگی کا درد «الْمَخَاضُ» ”بچے کی ولادت کی تکلیف“ شروع ہوئی تو میں (اضطراب کے عالم میں) گھر سے نکل پڑا اور ایک کڑکڑاتی سردی کی رات میں بیت اللہ کے پردوں میں چھپ کر بیٹھ گیا۔ اتنے میں نبی کریم صلی اللہ علیہ وسلم تشریف لائے اور حطیم (حجر) میں داخل ہوئے، اس وقت آپ صلی اللہ علیہ وسلم نے نعلین پہن رکھی تھیں، پھر آپ صلی اللہ علیہ وسلم نے جب تک اللہ کو منظور تھا نماز ادا کی اور پھر وہاں سے پلٹے۔ سیدنا عمر رضی اللہ عنہ بیان کرتے ہیں کہ میں نے آپ صلی اللہ علیہ وسلم سے (قرأت میں) ایسی کلام سنی جس کی مثال پہلے کبھی نہ سنی تھی، چنانچہ میں (پردوں سے) نکلا اور آپ صلی اللہ علیہ وسلم کے پیچھے چل پڑا، تو آپ صلی اللہ علیہ وسلم نے دریافت فرمایا: ”یہ کون ہے؟“ میں نے عرض کیا: ”عمر“۔ آپ صلی اللہ علیہ وسلم نے فرمایا: ”اے عمر! کیا تم رات میں اور نہ ہی دن میں میرا پیچھا چھوڑو گے؟“ سیدنا عمر رضی اللہ عنہ کہتے ہیں کہ مجھے اندیشہ ہوا کہ کہیں آپ صلی اللہ علیہ وسلم میرے خلاف بددعا نہ فرما دیں، تو میں نے فوراً عرض کیا: «أَشْهَدُ أَنْ لَا إِلَهَ إِلَّا اللهُ، وَأَنَّكَ رَسُولُ اللهِ» ”میں گواہی دیتا ہوں کہ اللہ کے سوا کوئی معبودِ برحق نہیں اور بے شک آپ اللہ کے رسول ہیں“۔ آپ صلی اللہ علیہ وسلم نے ارشاد فرمایا: ”اے عمر! اسے (فی الحال) پوشیدہ رکھو“۔ میں نے عرض کیا: ”ہرگز نہیں، اس ذات کی قسم جس نے آپ کو حق کے ساتھ مبعوث فرمایا ہے، میں اس کا ضرور اعلانیہ اظہار کروں گا جس طرح میں نے شرک کا برملا اظہار کیا تھا“۔
[مسند أبي يعلى: 4229، اس کی سند میں عبداللہ بن المؤمل اپنے حافظے کی بنا پر ضعیف ہے] ۔ [المطالب العالية بزوائد المسانيد الثمانية/كتاب السيرة والمغازي/حدیث: 4229]