مہاجر بن حبیب اور ابراہیم بن مصقلہ رحمہما اللہ سے روایت ہے کہ جب سیدنا عثمان بن عفان رضی اللہ عنہ کا محاصرہ کیا گیا تو انہوں نے سیدنا عبداللہ بن سلام رضی اللہ عنہ کو بلا بھیجا، جب وہ ان کے پاس آئے تو سیدنا عثمان رضی اللہ عنہ نے ان سے فرمایا: ”آپ اپنا سر اٹھائیں، کیا آپ کو یہ روشندان نظر آرہا ہے؟ بے شک رسول اللہ صلی اللہ علیہ وسلم نے آج رات اسی روشندان سے جھانک کر میری طرف دیکھا اور دریافت فرمایا: اے عثمان! کیا ان لوگوں نے تمہارا محاصرہ کر رکھا ہے؟ میں نے عرض کیا: جی ہاں، تو آپ صلی اللہ علیہ وسلم نے میرے لیے پانی کا ایک ڈول نیچے لٹکایا جس سے میں نے سیر ہو کر پانی پیا، اور اب بھی میں اس کی ٹھنڈک اپنے جگر میں محسوس کر رہا ہوں، پھر آپ صلی اللہ علیہ وسلم نے فرمایا: اگر تم چاہو تو میں اللہ تعالیٰ سے دعا کروں اور وہ تمہیں ان پر نصرت عطا فرما دے، اور اگر تم چاہو تو ہمارے پاس آ کر روزہ افطار کر لو۔“ سیدنا عبداللہ رضی اللہ عنہ نے دریافت کیا کہ آپ نے کس چیز کا انتخاب کیا؟ تو انہوں نے جواب دیا: ”میں نے آپ صلی اللہ علیہ وسلم کے پاس ہی افطار کرنے کو ترجیح دی۔“ اس کے بعد سیدنا عبداللہ رضی اللہ عنہ اپنے گھر واپس تشریف لے گئے، پھر جب سورج بلند ہوا تو انہوں نے اپنے صاحبزادے سے فرمایا: باہر جاؤ اور دیکھو کہ سیدنا عثمان رضی اللہ عنہ کے ساتھ کیا معاملہ ہوا؟ کیونکہ اب ان کا زندہ رہنا ممکن نہیں لگتا، چنانچہ وہ واپس آئے اور بتایا کہ ان کو شہید کر دیا گیا ہے۔
[مستدرک حاکم: 4408، امام حاکم نے اسے صحیح الاسناد قرار دیا ہے] [المطالب العالية بزوائد المسانيد الثمانية/كتاب الفتوح/حدیث: 4383]