سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بے شک جمعہ کا دن اور جمعہ کی رات چوبیس گھنٹوں پر مشتمل ہے، ان میں سے کوئی بھی ساعت ایسی نہیں ہے جس میں اللہ تعالیٰ جہنم کی آگ سے چھ سو ایسے افراد کو آزادی عطا نہ فرماتا ہو۔“ راوی بیان کرتے ہیں کہ پھر ہم وہاں سے رخصت ہوئے اور امام حسن بصری کی خدمت میں حاضر ہو کر ان سے ثابت کی بیان کردہ حدیث کا تذکرہ کیا، تو انہوں نے فرمایا کہ میں نے بھی یہ حدیث سنی ہے، اور انہوں نے اس میں یہ اضافہ کیا کہ: ”وہ تمام کے تمام جہنم کی آگ کے مستحق ہو چکے تھے۔“
امام ابو یعلیٰ ہی کی دوسری سند کے مطابق سیدنا انس رضی اللہ عنہ سے ہی اسی کے مثل مروی ہے، البتہ اس میں یہ الفاظ مروی ہیں کہ: ”چھ لاکھ افراد کو جہنم سے آزاد کیا جاتا ہے،“ اور اس روایت کے آخر میں مذکور ہے کہ ان دونوں میں سے ایک راوی نے کہا: ”وہ سب کے سب آگ کے مستحق ہو چکے تھے۔“ [المطالب العالية بزوائد المسانيد الثمانية/أبواب الجمعة/حدیث: 674]