سیدنا ابوبکر صدیق رضی اللہ عنہ سے روایت ہے کہ ایک دیہاتی نبی کریم صلی اللہ علیہ وسلم کی بارگاہ میں حاضر ہوا اور عرض کی: "مجھے یہ بات پہنچی ہے کہ آپ ارشاد فرماتے ہیں کہ ”ایک جمعہ سے دوسرا جمعہ اور پانچوں نمازیں اپنے درمیانی وقفے کے گناہوں کے لیے کفارہ بن جاتی ہیں، اس شخص کے لیے جو بڑے گناہوں سے بچتا رہے؟“ تو آپ صلی اللہ علیہ وسلم نے ارشاد فرمایا: ”ہاں (یہ درست ہے)“۔ پھر آپ صلی اللہ علیہ وسلم نے اس میں مزید اضافہ کرتے ہوئے فرمایا: ”جمعہ کے دن غسل کرنا گناہوں کا کفارہ ہے، اور جمعہ کی نماز کے لیے پیدل چل کر جانا بھی کفارہ ہے، اس کے ہر قدم کے بدلے بیس سال کے نیک عمل کا ثواب ملتا ہے، اور جب وہ جمعہ کی نماز سے فارغ ہوتا ہے تو اسے دو سو سال کے عمل کے برابر جزا دی جاتی ہے“۔
سیدنا عمران بن حصین اور سیدنا ابوبکر صدیق رضی اللہ عنہما سے مروی ہے کہ رسول اللہ صلی اللہ علیہ وسلم نے ارشاد فرمایا: ”جس نے جمعہ کے دن غسل کیا، اس کے گناہ اور خطائیں مٹادی جاتی ہیں، پھر جب وہ مسجد کی طرف چلنا شروع کرتا ہے تو اسے ہر قدم کے بدلے بیس سال کے عمل کا ثواب ملتا ہے، اور جب وہ نمازِ جمعہ سے فارغ ہوتا ہے تو اسے دو سو سال کی عبادت کا اجر عطا کیا جاتا ہے“۔ امام اسحاق بن راہویہ فرماتے ہیں کہ ضحاک بن حمرہ حدیث میں ثقہ ہیں، اور امام احمد نے اسے الزہد میں روایت کیا ہے۔ [المطالب العالية بزوائد المسانيد الثمانية/أبواب الجمعة/حدیث: 676]