سیدنا سہل بن سعد رضی اللہ عنہ سے روایت ہے کہ انہوں نے فرمایا: ”بیشک وہ لکڑی جو مقصورہ (مسجد نبوی کے مخصوص احاطے) میں موجود ہے، نبی کریم صلی اللہ علیہ وسلم جب (نماز یا خطبہ کے لیے) کھڑے ہوتے تو اس کا سہارا لیا کرتے تھے، پھر جب آپ صلی اللہ علیہ وسلم کی وفات ہوئی تو وہ لکڑی چوری کر لی گئی، چنانچہ اسے تلاش کیا گیا تو وہ بنو عمرو بن عوف کی مسجد سے ملی، اس وقت دیمک اسے (اندر سے کھا کر) کھوکھلا کر چکی تھی، چنانچہ اس کی حفاظت کی خاطر لکڑی کے دو تختے تراشے گئے اور انہیں اندر سے مجوف (کھوکھلا) کیا گیا، پھر ان دونوں تختوں کو اس (مقدس لکڑی) پر چڑھا کر بند کر دیا گیا، پھر ان دونوں لکڑیوں کو اس پر پیوند کی طرح جوڑ دیا گیا، پس اب جب آپ اسے دیکھتے ہیں تو آپ کو اس میں وہ جوڑ صاف نظر آتا ہے۔“
اس روایت کی سند حسن ہے اور اسے امام ابوبکر بن ابی شیبہ نے اپنی مصنف میں روایت کیا ہے۔ [المطالب العالية بزوائد المسانيد الثمانية/أبواب الجمعة/حدیث: 707]