سیدنا ابوہریرہ رضی اللہ عنہ سے روایت ہے کہ ایک خاتون نبی کریم صلی اللہ علیہ وسلم کی خدمت میں حاضر ہوئیں، ان کے ہمراہ ان کا ایک بیمار بیٹا تھا، انہوں نے عرض کی: ”اے اللہ کے رسول! اللہ تعالیٰ سے دعا فرمائیں کہ وہ میرے اس بیٹے کو صحت و شفا عطا فرما دے۔“ آپ صلی اللہ علیہ وسلم نے دریافت فرمایا: ”کیا تمہارا کوئی بچہ (بچپن میں) فوت ہو چکا ہے جو (آخرت میں تمہارے لیے) پیش رو ہو؟“ انہوں نے عرض کی: جی ہاں، وہ اسلام کی حالت میں فوت ہوئے ہیں۔ آپ صلی اللہ علیہ وسلم نے ارشاد فرمایا: ”تب تو وہ (تمہارے لیے دوزخ سے بچاؤ کی) ایک مضبوط ڈھال ہے، ایک مضبوط ڈھال ہے۔“
یہ سند حسن ہے، کیونکہ اگرچہ ابو عبیدہ کے متعلق کلام کیا گیا ہے لیکن یہی روایت ایک صحیح سند کے ساتھ ابو زرعہ کے واسطے سے سیدنا ابوہریرہ رضی اللہ عنہ سے مروی ہے۔ [المطالب العالية بزوائد المسانيد الثمانية/كتاب الجنائز/حدیث: 791]