794 - اور اسی سند کے ساتھ (مروی ہے کہ): انصار میں سے ایک شخص نبی اکرم صلی اللہ علیہ وسلم کی مجلس میں بیٹھا کرتے تھے اور ان کے ساتھ ان کا ایک پانچ برس کا بیٹا بھی ہوتا تھا، پھر اس بچے کا انتقال ہو گیا تو وہ اس کے غم میں شدید غمگین رہنے لگے۔ رسول اللہ صلی اللہ علیہ وسلم نے (ان سے) فرمایا: ”کیا تمہیں یہ بات خوش کرتی ہے کہ تم جنت کے جس دروازے پر بھی جاؤ، تو اسے (اپنے بچے کو) اسی دروازے پر پاؤ کہ وہ تمہیں اپنی طرف بلا رہا ہو؟“ انہوں نے عرض کیا: جی ہاں! آپ صلی اللہ علیہ وسلم نے فرمایا: ”تو یہ ویسے ہی ہے جیسے میں تم سے کہہ رہا ہوں“۔ [المطالب العالية بزوائد المسانيد الثمانية/كتاب الجنائز/حدیث: 794]