سیدنا قیس بن عاصم رضی اللہ عنہ سے روایت ہے کہ میں رسول اللہ صلی اللہ علیہ وسلم کی خدمتِ اقدس میں حاضر ہوا، جب میں آپ صلی اللہ علیہ وسلم کے قریب پہنچا تو میں نے آپ صلی اللہ علیہ وسلم کو یہ فرماتے ہوئے سنا: ”یہ صحرا نشینوں کے سردار ہیں۔“ میں نے سلام کیا اور بیٹھ گیا، پھر میں نے عرض کی: یا رسول اللہ! وہ کون سا مال ہے جس میں مجھ پر کسی مہمان یا کثیر اہل و عیال کی وجہ سے کوئی گرفت اور وبال نہ ہو؟ تو آپ صلی اللہ علیہ وسلم نے ارشاد فرمایا: ”چالیس اونٹ بہترین مال ہے، اور زیادہ سے زیادہ ساٹھ، اور بربادی ہے سینکڑوں اونٹ والوں کے لیے، سوائے اس شخص کے جو ان کا حق ان کی بہتات میں بھی ادا کرے اور ان کی مشقت میں بھی، اور سواری کے لیے ان کی پیٹھ عاریتاً دے، اور جفتی کے لیے اپنا سانڈ مہیا کرے، اور اپنا فربہ جانور ذبح کرے، اور قناعت کرنے والے صابر محتاج اور سوال کرنے والے کو کھانا کھلائے۔“ میں نے عرض کی: یا رسول اللہ! یہ کتنے ہی کریمانہ اور خوبصورت اخلاق ہیں، صورتحال یہ ہے کہ میرے اونٹوں کی کثرت کے سبب اس وادی میں جہاں میں مقیم ہوں کسی دوسرے کے اترنے کی جگہ نہیں بچتی، آپ صلی اللہ علیہ وسلم نے دریافت فرمایا: ”تم 'منیحہ' (دودھ پینے کے لیے جانور عارضی طور پر دینے) کے بارے میں کیا کرتے ہو؟“ میں نے عرض کی: میں تو ہر سال سو اونٹ منیحہ کے طور پر دے دیتا ہوں، آپ صلی اللہ علیہ وسلم نے پوچھا: ”تم 'عاریہ' (عام استعمال کے لیے مانگنے والوں) کے ساتھ کیا معاملہ کرتے ہو؟“ میں نے عرض کی: اونٹ صبح چرنے نکلتے ہیں اور لوگ بھی آ جاتے ہیں، جو کسی اونٹ کی نکیل پکڑ لیتا ہے وہ اسے لے جاتا ہے، آپ صلی اللہ علیہ وسلم نے پوچھا: ”تم 'فقار' (سواری و باربرداری کے لیے اونٹ دینے) کے متعلق کیا کرتے ہو؟“ میں نے عرض کی: میں جوان اونٹ اور عمر رسیدہ اونٹنیاں بھی اس مقصد کے لیے دے دیتا ہوں، آپ صلی اللہ علیہ وسلم نے ارشاد فرمایا: ”کیا تمہیں یہ سب کرنا زیادہ محبوب ہے یا تمہارے وارث کا مال؟“ میں نے عرض کی: بلکہ مجھے تو اپنا مال پسند ہے، آپ صلی اللہ علیہ وسلم نے فرمایا: ”تمہارے مال میں سے تمہارا اپنا حصہ تو صرف وہی ہے جو تم نے کھا کر ختم کر دیا، یا پہن کر بوسیدہ کر دیا، یا اللہ کی راہ میں دے کر اپنے حق میں نافذ کر دیا، اور جو باقی بچ گیا وہ تمہارے وارث کا ہے،“ میں نے عرض کی: کیا وہ وارث کا ہے؟ آپ صلی اللہ علیہ وسلم نے فرمایا: ”ہاں،“ میں نے عرض کی: اللہ کی قسم! اگر میں زندہ رہا تو میں اپنے اونٹوں کی تعداد کو صدقہ کر کے ضرور کم کر دوں گا۔
امام حسن بصری رحمہ اللہ بیان کرتے ہیں کہ پھر قیس بن عاصم رضی اللہ عنہ نے اپنے قول کے مطابق ویسا ہی کر دکھایا، «رَحِمَهُ اللهُ» (اللہ ان پر رحم فرمائے)۔ [المطالب العالية بزوائد المسانيد الثمانية/كتاب الزكاة/حدیث: 957]