مجاہد رحمہ اللہ کہتے ہیں: سیدہ اسماء بنت عمیس رضی اللہ عنہا نے کہا: میں سیدہ عائشہ رضی اللہ عنہا کی وہ ساتھی تھی جس نے انہیں تیار کیا اور دیگر عورتوں کے ساتھ مل کر انہیں رسول اللہ صلی اللہ علیہ وسلم کے پاس پہنچایا، تو ہمیں دودھ کے ایک پیالے کے سوا کچھ نہ ملا، تو آپ صلی اللہ علیہ وسلم نے اس میں سے پیا، پھر لڑکی کو دیا تو وہ شرما گئی، میں نے کہا: رسول اللہ صلی اللہ علیہ وسلم کا ہاتھ واپس نہ کرو، تو لڑکی نے پی لیا، پھر آپ صلی اللہ علیہ وسلم نے فرمایا: ”اپنی ساتھیوں کو بھی دو۔“ تو انہوں نے کہا: ہمیں اس کی خواہش نہیں۔ آپ صلی اللہ علیہ وسلم نے فرمایا: ”جھوٹ اور بھوک اکٹھے نہ کرو۔“ میں نے عرض کیا: اگر ہم میں سے کوئی کسی ایسی چیز کے بارے میں جس کی ہمیں خواہش ہو، یہ کہے کہ ہمیں اس کی خواہش نہیں، تو کیا یہ جھوٹ شمار ہوگا؟ آپ صلی اللہ علیہ وسلم نے فرمایا: ”جھوٹ جھوٹ ہی لکھا جاتا ہے، یہاں تک کہ ایک ایک جھوٹ بھی جھوٹ ہی لکھا جاتا ہے۔“ [المعجم الكبير للطبراني/مسند النساء/حدیث: 20771]