سعید بن ابی ہند رحمہ اللہ بیان کرتے ہیں کہ سیدہ ام ہانی بنت ابی طالب رضی اللہ عنہا نے انہیں بتایا کہ علی بن ابی طالب رضی اللہ عنہ فتح کے موقع پر مکہ میں ان کے پاس آئے، تو انہوں نے ان کے پاس ان کے شوہر کے خاندان کے دو آدمی پائے جو ان کے پاس بھاگ کر آئے تھے، تو وہ انہیں قتل کرنا چاہتے تھے، جب میں نے یہ دیکھا تو میں نے اپنا دروازہ ان پر بند کر دیا، پھر میں رسول اللہ صلی اللہ علیہ وسلم کے پاس گئی جبکہ آپ صلی اللہ علیہ وسلم مکہ کی بلندی پر تھے، جب آپ صلی اللہ علیہ وسلم نے مجھے دیکھا تو خوش آمدید کہا اور فرمایا: ”اے ام ہانی! تمہیں کیا لے کر آیا؟“ میں نے عرض کیا: یا رسول اللہ! میرے شوہر کے خاندان کے دو آدمی میری پناہ میں آئے، تو علی نے انہیں میرے پاس پا کر انہیں قتل کرنے کا ارادہ ظاہر کیا، اسی سلسلے میں آپ صلی اللہ علیہ وسلم کے پاس آئی ہوں۔ آپ صلی اللہ علیہ وسلم نے فرمایا: ”جسے تم نے پناہ دی ہم نے بھی اسے پناہ دی، اور جسے تم نے امان دی ہم نے بھی اسے امان دی۔“ پھر میں نے آپ صلی اللہ علیہ وسلم کے لیے پانی ڈالا تو آپ صلی اللہ علیہ وسلم نے غسل فرمایا، آپ صلی اللہ علیہ وسلم کی بیٹی سیدہ فاطمہ رضی اللہ عنہا نے کپڑے سے پردہ کیا، پھر جب آپ صلی اللہ علیہ وسلم غسل سے فارغ ہوئے تو کپڑا اتار کر پھینک دیا، پھر کھڑے ہو کر آٹھ سجدوں (رکعتوں) کی نماز پڑھی اور یہ چاشت کا وقت تھا۔ [المعجم الكبير للطبراني/مسند النساء/حدیث: 21424]