سیدنا جریر رضی اللہ عنہ بیان کرتے ہیں: ہم رسول اللہ صلی اللہ علیہ وسلم کے ساتھ ایک حج کے موسم میں حاضر ہوئے، اور یہ حجۃ الوداع کا موقع تھا، تو ہم غدیر خم نامی جگہ پر پہنچے، آپ صلی اللہ علیہ وسلم نے اعلان کروایا: نماز کے لیے جمع ہو جاؤ۔ چنانچہ مہاجرین اور انصار سب جمع ہو گئے، رسول اللہ صلی اللہ علیہ وسلم ہمارے درمیان کھڑے ہوئے اور فرمایا: ”اے لوگو! تم کس بات کی گواہی دیتے ہو؟“ لوگوں نے کہا: ہم گواہی دیتے ہیں کہ اللہ کے سوا کوئی سچا معبود نہیں۔ فرمایا: ”پھر کیا؟“ لوگوں نے کہا: اور یہ کہ محمد صلی اللہ علیہ وسلم اس کے بندے اور رسول ہیں۔ فرمایا: ”تمہارا ولی (کارساز) کون ہے؟“ لوگوں نے کہا: اللہ اور اس کا رسول ہمارے مولا ہیں۔ فرمایا: ”تمہارا ولی کون ہے؟“ پھر آپ صلی اللہ علیہ وسلم نے اپنا ہاتھ سیدنا علی رضی اللہ عنہ کے بازو پر مارا اور انہیں کھڑا کیا، پھر ان کا بازو کھینچا اور ان کی کلائیاں پکڑ لیں، پھر فرمایا: ”جس کا مولا اللہ اور اس کا رسول ہو، تو یہ (علی) بھی اس کے مولا ہیں۔ اے اللہ! جو اس سے دوستی رکھے تو اس سے دوستی رکھ، اور جو اس سے دشمنی رکھے تو اس سے دشمنی رکھ۔ اے اللہ! جو لوگوں میں سے اس سے محبت رکھے تو اس کا محب ہو جا، اور جو اس سے بغض رکھے تو اس کا مبغض ہو جا۔ اے اللہ! میں زمین میں ان دو نیک بندوں کے بعد تیرے سوا کسی کو نہیں پاتا جس کے سپرد اسے کروں، سو تو اس کے بارے میں بھلائی کا فیصلہ فرما۔“ بشر کہتے ہیں: میں نے پوچھا: یہ دو نیک بندے کون ہیں؟ انہوں نے کہا: مجھے معلوم نہیں۔ [المعجم الكبير للطبراني/باب الجيم/حدیث: 2492]