اصبغ بن نباتہ رحمہ اللہ کہتے ہیں: میں سیدنا علی بن ابی طالب رضی اللہ عنہ کے ساتھ سیدنا حسن بن علی رضی اللہ عنہ کی عیادت کے لیے ان کے پاس گیا، تو سیدنا علی رضی اللہ عنہ نے ان سے کہا: اے رسول اللہ کے بیٹے! تمہاری صبح کیسی ہوئی؟ انہوں نے کہا: اللہ کا شکر ہے، میں صحت یاب ہو کر صبح کی۔ فرمایا: ان شاء اللہ ایسا ہی ہو گا۔ پھر سیدنا حسن رضی اللہ عنہ نے فرمایا: مجھے سہارا دو۔ تو سیدنا علی رضی اللہ عنہ نے انہیں اپنے سینے سے ٹیک لگوائی، تو انہوں نے فرمایا: میں نے اپنے نانا رسول اللہ صلی اللہ علیہ وسلم کو فرماتے سنا: ”جنت میں ایک درخت ہے جسے شجرۃ البلویٰ (آزمائش کا درخت) کہا جاتا ہے، قیامت کے دن آزمائش زدہ لوگوں کو لایا جائے گا، تو نہ ان کا کوئی رجسٹر کھولا جائے گا اور نہ ان کے لیے کوئی میزان رکھا جائے گا، ان پر اجر خوب انڈیلا جائے گا۔“ اور آپ نے یہ آیت تلاوت فرمائی: ”صبر کرنے والوں کو تو ان کا اجر بےحساب پورا پورا دیا جائے گا“ [سورۃ الزمر: 10] ۔ [المعجم الكبير للطبراني/باب الحاء/حدیث: 2747]