سیدنا ابو سعید خدری رضی اللہ عنہ سے روایت ہے کہ صحابہ کرام بیٹھے ہوئے تلاوت کر رہے تھے اور دعائیں مانگ رہے تھے کہ رسول اللہ صلی اللہ علیہ وسلم ان کے پاس تشریف لائے، سیدنا ابو سعید خدری رضی اللہ عنہ بیان کرتے ہیں کہ جب ہم نے آپ صلی اللہ علیہ وسلم کو دیکھا تو ہم (احتراماً) خاموش ہو گئے، آپ صلی اللہ علیہ وسلم نے دریافت فرمایا: ”کیا تم لوگ اسی طرح (ذکر و دعا) نہیں کر رہے تھے؟“ ہم نے عرض کیا: جی ہاں، آپ صلی اللہ علیہ وسلم نے ارشاد فرمایا: ”پس تم ویسے ہی کرتے رہو جیسے کر رہے تھے۔“ پھر آپ صلی اللہ علیہ وسلم ہمارے ساتھ تشریف فرما ہوئے اور ارشاد فرمایا: ”اے نادار مہاجرین! تمہیں قیامت کے دن مالداروں سے پانچ سو سال پہلے کامیابی و بامرادی کی خوشخبری ہو، یہاں تک کہ (تمہارا بلند مقام دیکھ کر) مالدار شخص یہ تمنا کرے گا کہ کاش وہ دنیا میں فقیر یا تنگ دست ہوتا۔“ [مسند أبي يعلى الموصلي/من مسند أبي سعيد الخدري/حدیث: 1317]