ابوالوداک رحمہ اللہ بیان کرتے ہیں کہ میرا اور میرے ایک ساتھی کا سبز گھڑے (حنتم) کے متعلق اختلاف ہوا، چنانچہ ہم سیدنا ابوسعید خدری رضی اللہ عنہ کے پاس حاضر ہوئے اور ان سے عرض کی کہ ہمیں وہ بات بتائیں جو آپ نے سبز گھڑے کے بارے میں رسول اللہ صلی اللہ علیہ وسلم سے سنی ہو؟ انہوں نے فرمایا: ”اگر تم نے یہ بات پوچھی ہے تو (سنو!) رسول اللہ صلی اللہ علیہ وسلم کے عہدِ مبارک میں ہماری کیفیت یہ ہوتی تھی کہ کبھی ہم میں سے کوئی آپ کی مجلس میں حاضر ہوتا اور خود آپ سے سماعت کرتا، اور کبھی کوئی اپنے کام کاج میں مشغول ہوتا تو وہ اس وقت پہنچتا جب رسول اللہ صلی اللہ علیہ وسلم (مجلس سے) اٹھ چکے ہوتے، تو وہ شخص پوچھتا کہ آپ صلی اللہ علیہ وسلم نے کیا فرمایا ہے؟ چنانچہ ہم اسے وہ بتا دیتے جو رسول اللہ صلی اللہ علیہ وسلم نے ارشاد فرمایا ہوتا تھا۔ ایک روز ایک شرابی لایا گیا تو اسے ہاتھوں سے مارا گیا اور جوتوں سے پیٹا گیا، اس نے عرض کی: اے اللہ کے رسول! اللہ کی قسم میں نے شراب نہیں پی۔ آپ صلی اللہ علیہ وسلم نے دریافت فرمایا: ”پھر تم نے کیا پیا؟“ اس نے عرض کی: میں نے صرف چند کھجوریں اور کچھ کشمش لے کر انہیں اپنے کدو کے ایک برتن (دباء) میں ڈال دیا تھا۔ تب رسول اللہ صلی اللہ علیہ وسلم نے کدو کے برتن اور روغنِ قیر ملے ہوئے برتن (مزفت) میں کھجور اور کشمش کو ایک ساتھ ملا کر بھگونے سے منع فرما دیا۔“ [مسند أبي يعلى الموصلي/من مسند أبي سعيد الخدري/حدیث: 1322]