عبید اللہ بن عبد اللہ بن عتبہ رحمہ اللہ بیان کرتے ہیں کہ میں سیدنا عثمان بن حنیف رضی اللہ عنہ کے ساتھ سیدنا ابو طلحہ رضی اللہ عنہ کی عیادت کے لیے گیا جو اس وقت علیل تھے، وہ کہتے ہیں کہ جب ہم ان کے پاس پہنچے تو ان کے بستر پر ایک ایسی چادر بچھی تھی جس میں تصویریں بنی ہوئی تھیں، انہوں نے (اپنے اہل خانہ سے) فرمایا: ”اسے میرے نیچے سے نکال دو۔“ تو سیدنا عثمان رضی اللہ عنہ نے ان سے دریافت کیا: ”اے ابو طلحہ! کیا آپ نے رسول اللہ صلی اللہ علیہ وسلم کو تصویروں کی ممانعت کے وقت یہ فرماتے ہوئے نہیں سنا تھا کہ ”سوائے کپڑے کے نقش و نگار کے یا اس کپڑے کے جس میں نقش و نگار ہوں؟““ انہوں نے جواب دیا: ”ہاں (میں نے سنا تھا)، لیکن میرے دل کے اطمینان کے لیے یہی بات زیادہ پسندیدہ ہے کہ ایسی چیز میرے نیچے نہ ہو۔“ [مسند أبي يعلى الموصلي/مسند عثمان بن حنيف/حدیث: 1440]