سیدنا عمرو بن خارجہ رضی اللہ عنہ سے روایت ہے کہ رسول اللہ صلی اللہ علیہ وسلم نے اونٹنی پر سوار ہو کر خطبہ ارشاد فرمایا جبکہ میں اس کی گردن کے نیچے موجود تھا اور وہ جگالی کر رہی تھی اور اس کا لعاب میرے دونوں کندھوں کے درمیان بہہ رہا تھا، پس آپ صلی اللہ علیہ وسلم نے ارشاد فرمایا: ”اے لوگو! بیشک اللہ تعالیٰ نے ہر حق دار کو اس کا حق دے دیا ہے، لہٰذا اب کسی وارث کے حق میں کوئی وصیت جائز نہیں؛ اور بچہ اسی کا ہے جس کے بستر پر (نکاح کی حالت میں) پیدا ہوا اور زانی کے لیے پتھر (یعنی محرومی یا سزا) ہے؛ اور جو شخص اپنے باپ کے علاوہ کسی اور کی طرف اپنی نسبت کرے یا اپنے اصل مربیوں (آزاد کرنے والوں) سے اعراض کرتے ہوئے کسی اور کی طرف اپنی نسبت منسوب کرے تو اس پر اللہ تعالیٰ، فرشتوں اور تمام انسانوں کی لعنت ہے، اللہ تعالیٰ اس کی طرف سے نہ کوئی فرض عبادت قبول فرمائے گا اور نہ ہی کوئی نفل۔“ [مسند أبي يعلى الموصلي/مسند عمرو بن خارجة/حدیث: 1508]