سیدنا مقداد بن عمرو الکندی رضی اللہ عنہ سے روایت ہے کہ میں رسول اللہ صلی اللہ علیہ وسلم کی خدمت میں حاضر ہوا اور میرے ساتھ میرے دو ساتھی بھی تھے، ہم نے کوشش کی کہ کوئی ہمیں مہمان بنا لے مگر کسی نے ہمیں جگہ نہ دی، چنانچہ ہم رسول اللہ صلی اللہ علیہ وسلم کی بارگاہ میں حاضر ہوئے اور عرض کی: ”اے اللہ کے رسول! ہمیں سخت بھوک اور مشقت نے آ لیا ہے، ہم نے کوشش کی کہ کوئی ہمیں مہمان بنا لے مگر کسی نے ہمیں نہیں ٹھہرایا“، تب آپ صلی اللہ علیہ وسلم نے چار بکریاں ہمیں عطا فرمائیں اور فرمایا: ”اے مقداد! انہیں لے جاؤ، ان کا دودھ نکالو اور اسے چار حصوں میں تقسیم کرو: ایک حصہ میرے لیے، ایک تمہارے لیے اور ایک ایک حصہ تمہارے دونوں ساتھیوں کے لیے“، میں اسی طرح کرتا رہا، ایک رات میں نے اپنا حصہ پی لیا اور میرے دونوں ساتھیوں نے بھی اپنے حصے پی لیے، جبکہ میں نے نبی کریم صلی اللہ علیہ وسلم کا حصہ پیالے میں نکال کر اسے ڈھانپ دیا، نبی کریم صلی اللہ علیہ وسلم کو واپسی میں دیر ہو گئی تو میرے جی میں آیا کہ رسول اللہ صلی اللہ علیہ وسلم کو یقیناً مدینہ کے کسی گھرانے نے دعوت پر بلا لیا ہو گا اور آپ صلی اللہ علیہ وسلم نے وہیں کھانا کھا لیا ہو گا، لہٰذا آپ صلی اللہ علیہ وسلم کو اس دودھ کی ضرورت نہیں ہو گی، میرا نفس مجھے مسلسل اکساتا رہا یہاں تک کہ میں اٹھا اور پیالے میں موجود تمام دودھ پی گیا، جب دودھ میرے پیٹ میں جا کر ٹھہر گیا تو مجھ پر ندامت اور خوف کی شدید کیفیت طاری ہو گئی اور میرا دل کہنے لگا: رسول اللہ صلی اللہ علیہ وسلم بھوکے اور پیاسے تشریف لائیں گے اور جب پیالہ اٹھائیں گے تو اس میں کچھ نہ پا کر کہیں تمہارے لیے بددعا نہ کر دیں، چنانچہ میں نے خود پر چادر اوڑھ لی گویا میں سو رہا ہوں حالانکہ مجھے نیند نہیں آ رہی تھی، پھر رسول اللہ صلی اللہ علیہ وسلم تشریف لائے اور آپ صلی اللہ علیہ وسلم نے اتنی دھیمی آواز میں سلام کیا کہ بیدار شخص سن لے اور سونے والے کی نیند خراب نہ ہو، جب آپ صلی اللہ علیہ وسلم نے پیالے میں کچھ نہ پایا تو اپنا سر مبارک آسمان کی طرف اٹھا کر دعا فرمائی: «اللَّهُمَّ أَطْعِمْ مَنْ أَطْعَمَنَا وَاسْقِ مَنْ سَقَانَا» ”اے اللہ! اسے کھانا کھلا جس نے ہمیں کھلایا اور اسے سیراب کر جس نے ہمیں پلایا“، سیدنا مقداد رضی اللہ عنہ فرماتے ہیں کہ میں نے آپ صلی اللہ علیہ وسلم کی اس دعا کو غنیمت جانا اور چھری لے کر اس ارادے سے اٹھا کہ ان بکریوں میں سے کسی کو ذبح کر کے آپ صلی اللہ علیہ وسلم کی ضیافت کروں، مگر جب میں نے بکری کے تھنوں پر ہاتھ لگایا تو وہ دودھ سے لبریز تھے، میں نے تمام بکریوں کو دیکھا تو وہ سب کی سب دودھ سے بھری ہوئی تھیں، میں نے پیالے میں اتنا دودھ نکالا کہ وہ بھر گیا، پھر میں وہ پیالہ لے کر آپ صلی اللہ علیہ وسلم کی خدمت میں حاضر ہوا تو میں مسکرا رہا تھا، آپ صلی اللہ علیہ وسلم نے فرمایا: ”اے مقداد! کیا یہ تمہاری کسی شرارت کا نتیجہ ہے؟“ میں نے عرض کی: ”اے اللہ کے رسول! آپ نوش فرمائیں، میں بعد میں بتاؤں گا“، آپ صلی اللہ علیہ وسلم کے نوش فرما لینے کے بعد میں نے بقیہ دودھ پی لیا اور پھر آپ صلی اللہ علیہ وسلم کو پوری صورتحال سے آگاہ کیا، تو آپ صلی اللہ علیہ وسلم نے فرمایا: ”اے مقداد! یہ اللہ کی طرف سے نازل کردہ برکت تھی، کتنا اچھا ہوتا کہ تم مجھے بتا دیتے تاکہ ہم اپنے ان دونوں ساتھیوں کو بھی بیدار کرتے اور وہ بھی اس برکت سے فیض یاب ہوتے“، میں نے عرض کی: ”اے اللہ کے رسول! جب اس برکت کو آپ نے اور میں نے حاصل کر لیا تو اب مجھے کوئی پروا نہیں کہ یہ کسی اور کو نہ مل سکی۔“ [مسند أبي يعلى الموصلي/المقداد بن عمرو الكندي/حدیث: 1517]