سیدنا عبد اللہ بن حارث بن جزء زبیدی رضی اللہ عنہ سے روایت ہے کہ وہ اور ان کے ایک ساتھی سیدہ امِ ایمن رضی اللہ عنہا کے پاس سے گزرے، وہاں قریش کے کچھ نوجوان موجود تھے جنہوں نے اپنے تہبند کھول کر انہیں کوڑوں کی طرح لپیٹ رکھا تھا اور وہ برہنہ حالت میں ان کے ساتھ ایک دوسرے کو مار رہے تھے، سیدنا عبد اللہ رضی اللہ عنہ بیان کرتے ہیں کہ جب ہم ان کے پاس سے گزرے تو وہ (ہمارا تمسخر اڑاتے ہوئے) کہنے لگے: ”یہ تو بڑے پارسا اور عبادت گزار لوگ ہیں، انہیں جانے دو“، پھر رسول اللہ صلی اللہ علیہ وسلم ان کی طرف تشریف لائے تو آپ صلی اللہ علیہ وسلم کو دیکھتے ہی وہ سب ادھر ادھر بھاگ گئے، رسول اللہ صلی اللہ علیہ وسلم انتہائی غصے کی حالت میں واپس لوٹ آئے یہاں تک کہ اپنے حجرے میں داخل ہو گئے، میں حجرہ مبارک کے پیچھے موجود تھا تو میں نے آپ صلی اللہ علیہ وسلم کو یہ فرماتے ہوئے سنا: «سُبْحَانَ اللَّهِ، لَا مِنَ اللَّهِ اسْتَحْيَوْا، وَلَا مِنْ رَسُولِهِ اسْتَتَرُوا» ”اللہ کی ذات پاک ہے! نہ انہوں نے اللہ سے حیا کی اور نہ ہی اللہ کے رسول سے پردہ کیا“، اس وقت سیدہ امِ ایمن رضی اللہ عنہا آپ صلی اللہ علیہ وسلم کے پاس موجود تھیں اور عرض کر رہی تھیں کہ اے اللہ کے رسول صلی اللہ علیہ وسلم ! ان کے لیے دعائے مغفرت فرما دیں، سیدنا عبد اللہ رضی اللہ عنہ کہتے ہیں کہ میرے والد آپ صلی اللہ علیہ وسلم پر قربان ہوں! آپ صلی اللہ علیہ وسلم نے ان کے لیے مغفرت کی دعا نہیں فرمائی۔ [مسند أبي يعلى الموصلي/عبد الله بن الحارث بن جزء الزبيدي/حدیث: 1540]