سیدنا رباح بن ربیع رضی اللہ عنہ سے روایت ہے، انہوں نے بیان فرمایا کہ ہم ایک غزوے میں رسول اللہ صلی اللہ علیہ وسلم کے ہمراہ تھے اور لشکر کے ہراول دستے کی قیادت سیدنا خالد بن ولید رضی اللہ عنہ فرما رہے تھے، اسی دوران راستے میں ایک مقتول عورت ملی جسے ہراول دستے نے (جنگ کے دوران) قتل کر دیا تھا، لوگ اس کی حالت دیکھ کر حیران ہو رہے تھے، پھر رسول اللہ صلی اللہ علیہ وسلم وہاں تشریف لائے اور اس کے پاس ٹھہر کر ارشاد فرمایا: ”افسوس! یہ تو لڑنے والوں میں سے نہ تھی“، پھر آپ صلی اللہ علیہ وسلم نے ایک شخص کو حکم دیا: ”خالد کے پاس جاؤ (اور انہیں میرا یہ پیغام پہنچاؤ) کہ وہ ہرگز کسی بچے اور کسی مزدور کو قتل نہ کریں“۔ [مسند أبي يعلى الموصلي/مسند رباح بن ربيع/حدیث: 1546]