سیدنا معن بن یزید رضی اللہ عنہ سے روایت ہے کہ انہوں نے کہا: ”میں نے، میرے والد نے اور میرے دادا نے رسول اللہ صلی اللہ علیہ وسلم کی بیعت کی تھی، میں ایک جھگڑا لے کر آپ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے میرے حق میں فیصلہ صادر فرمایا، آپ صلی اللہ علیہ وسلم نے میرے لیے نکاح کا پیغام دیا اور میرا نکاح فرمایا۔“ اور سیدنا معن رضی اللہ عنہ نے (رسول اللہ صلی اللہ علیہ وسلم کا یہ فرمان نقل) فرمایا: ”مالِ غنیمت اس وقت تک حلال نہیں ہوتا جب تک اسے تمام لوگوں میں ایک ساتھ تقسیم نہ کر دیا جائے، چنانچہ جب وہ تقسیم کر دیا جائے تو میرے لیے حلال ہے کہ میں تمہیں (تمہارا حصہ) عطا کر دوں۔“ یہ الفاظ خاص طور پر عبد الاعلیٰ نامی راوی کی روایت کے ہیں اور ان کے علاوہ کسی دوسرے کی روایت میں یہ الفاظ موجود نہیں ہیں کہ: ”پھر جب وہ تقسیم کر دیا جائے گا تو میں تمہیں دوں گا۔“ [مسند أبي يعلى الموصلي/مسند معن بن يزيد/حدیث: 1551]