الحکم بن میناء رحمہ اللہ سے روایت ہے کہ نبی کریم صلی اللہ علیہ وسلم نے سیدنا عمر رضی اللہ عنہ سے فرمایا: ”یہاں موجود قریش کے لوگوں کو میرے پاس جمع کرو۔“ چنانچہ انہوں نے ان سب کو جمع کر دیا، پھر عرض کیا: ”اے اللہ کے رسول صلی اللہ علیہ وسلم ! کیا آپ ان کے پاس تشریف لے جائیں گے یا وہ آپ کی خدمت میں حاضر ہوں؟“ آپ صلی اللہ علیہ وسلم نے فرمایا: ”بلکہ میں خود ان کے پاس جاتا ہوں۔“ چنانچہ آپ صلی اللہ علیہ وسلم تشریف لے گئے اور فرمایا: ”اے گروہِ قریش! کیا تمہارے درمیان تمہارے علاوہ کوئی اور بھی موجود ہے؟“ انہوں نے عرض کیا: ”نہیں، سوائے ہماری بہنوں کے بیٹوں کے۔“ آپ صلی اللہ علیہ وسلم نے فرمایا: ”کسی قوم کا بھانجا انہی میں شمار ہوتا ہے۔“ پھر آپ صلی اللہ علیہ وسلم نے ارشاد فرمایا: ”اے گروہِ قریش! جان لو کہ لوگوں میں سے نبی کے سب سے زیادہ قریب متقی لوگ ہیں، پس اس بات کا خیال رکھنا کہ ایسا نہ ہو کہ قیامت کے دن لوگ تو اپنے (نیک) اعمال لے کر آئیں اور تم دنیا کو اپنے اوپر لاد کر آؤ اور میں تم سے اپنا رخِ انور پھیر لوں۔“ پھر آپ صلی اللہ علیہ وسلم نے یہ آیتِ مبارکہ تلاوت فرمائی: ﴿بے شک لوگوں میں ابراہیم کے سب سے زیادہ قریب وہ لوگ ہیں جنہوں نے ان کی پیروی کی اور یہ نبی اور وہ لوگ جو ایمان لائے، اور اللہ مومنوں کا ولی ہے﴾ ۔ [مسند أبي يعلى الموصلي/مسند الحكم بن ميناء/حدیث: 1579]