سیدنا جابر رضی اللہ عنہ سے روایت ہے کہ ”نبی کریم صلی اللہ علیہ وسلم نے رمضان المبارک میں سفر فرمایا تو آپ کے اصحاب میں سے ایک شخص پر روزہ بہت شاق گزرا، یہاں تک کہ اس کی اونٹنی اسے لیے ہوئے درختوں کے سائے تلے (پیاس اور نقاہت کی وجہ سے) بھٹکنے لگی، جب نبی کریم صلی اللہ علیہ وسلم کو اس صورتحال سے مطلع کیا گیا تو آپ صلی اللہ علیہ وسلم نے اسے روزہ افطار کرنے کا حکم دیا، پھر رسول اللہ صلی اللہ علیہ وسلم نے پانی کا ایک برتن طلب فرمایا اور اسے اپنے دستِ مبارک پر (بلند کر کے) رکھا، پھر جب لوگوں نے آپ صلی اللہ علیہ وسلم کو دیکھ لیا تو آپ صلی اللہ علیہ وسلم نے پانی نوش فرمایا اور آپ صلی اللہ علیہ وسلم کی اتباع میں ان سب نے بھی پانی پی لیا۔“ [مسند أبي يعلى الموصلي/مسند جابر/حدیث: 1780]