سیدنا جابر بن عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم مکہ مکرمہ میں (باہر) تشریف لے گئے تو آپ کا گزر ایک ایسے شخص پر ہوا جو ایک چٹان پر کھڑا نماز پڑھ رہا تھا، پھر آپ مکہ کے ایک گوشے کی طرف تشریف لے گئے اور وہاں کافی دیر ٹھہرے رہے، پھر جب واپس آئے تو اس شخص کو اسی حالت میں مسلسل نماز پڑھتے ہوئے پایا، اس پر آپ صلی اللہ علیہ وسلم نے (توجہ دلانے کے لیے) اپنے دونوں ہاتھ جمع کیے اور تین مرتبہ ارشاد فرمایا: «يَا أَيُّهَا النَّاسُ، عَلَيْكُمْ بِالْقَصْدِ، عَلَيْكُمْ بِالْقَصْدِ، عَلَيْكُمْ بِالْقَصْدِ، فَإِنَّ اللَّهَ لَنْ يَمَلَّ حَتَّى تَمَلُّوا» ”اے لوگو! تم پر میانہ روی لازم ہے، تم میانہ روی اختیار کرو، تم اعتدال کو لازم پکڑو، کیونکہ اللہ تعالیٰ (اجر و ثواب دینے سے) نہیں اکتاتا یہاں تک کہ تم خود (عبادت سے) اکتا جاؤ۔“ [مسند أبي يعلى الموصلي/مسند جابر/حدیث: 1796]