سیدنا جابر رضی اللہ عنہ سے روایت ہے کہ جب نبی صلی اللہ علیہ وسلم پر یہ آیتِ کریمہ ﴿قُلْ هُوَ الْقَادِرُ عَلَى أَنْ يَبْعَثَ عَلَيْكُمْ عَذَابًا مِنْ فَوْقِكُمْ﴾ ”آپ فرما دیجیے کہ وہ اس بات پر قادر ہے کہ تم پر تمہارے اوپر سے کوئی عذاب مسلط کر دے“ نازل ہوئی تو آپ صلی اللہ علیہ وسلم نے عرض کیا: «أَعُوذُ بِوَجْهِكَ» ”میں تیری ذات کی پناہ مانگتا ہوں“، پھر جب آیت کا اگلا حصہ ﴿أَوْ مِنْ تَحْتِ أَرْجُلِكُمْ﴾ ”یا تمہارے قدموں کے نیچے سے (کوئی عذاب بھیج دے)“ نازل ہوا تو آپ صلی اللہ علیہ وسلم نے پھر عرض کیا: «أَعُوذُ بِوَجْهِكَ» ”میں تیری ذات کی پناہ مانگتا ہوں“، اور جب یہ حصہ ﴿أَوْ يُلْبِسَكُمْ شِيَعًا وَيُذِيقَ بَعْضَكُمْ بَأْسَ بَعْضٍ﴾ ”یا تمہیں مختلف گروہوں میں خلط ملط کر دے اور تمہیں ایک دوسرے کی لڑائی کا مزہ چکھا دے“ نازل ہوا تو آپ صلی اللہ علیہ وسلم نے ارشاد فرمایا: ”یہ (آخری صورتیں پہلی دو کے مقابلے میں) زیادہ ہلکی یا زیادہ آسان ہیں۔“ [مسند أبي يعلى الموصلي/مسند جابر/حدیث: 1829]