سیدنا جابر رضی اللہ عنہ سے روایت ہے کہ بخار نبی کریم صلی اللہ علیہ وسلم کی بارگاہ میں حاضر ہوا اور آپ سے اندر آنے کی اجازت طلب کی، آپ صلی اللہ علیہ وسلم نے دریافت فرمایا: ”تم کون ہو؟“ اس نے عرض کیا: ”میں امِ ملدم (بخار) ہوں۔“ آپ صلی اللہ علیہ وسلم نے دریافت فرمایا: ”کیا تم اہل قبا کی طرف جانے کا راستہ پا لو گی؟“ اس نے عرض کیا: ”جی ہاں۔“ چنانچہ بخار ان کے پاس چلا گیا اور انہیں بخار نے آگھیر لیا جس کی وجہ سے انہیں سخت مشقت کا سامنا کرنا پڑا، پھر انہوں نے آپ صلی اللہ علیہ وسلم سے اس کی شکایت کی اور عرض کیا: ”اے اللہ کے رسول! ہمیں اس بخار سے سخت تکلیف پہنچی ہے،“ آپ صلی اللہ علیہ وسلم نے ارشاد فرمایا: ”اگر تم چاہو تو میں اللہ تعالیٰ سے دعا کروں تو وہ اسے تم سے دور فرما دے گا اور اگر تم چاہو تو یہ تمہارے لیے گناہوں سے پاکیزگی کا ذریعہ بن جائے گا،“ انہوں نے عرض کیا: ”نہیں، بلکہ یہ ہمارے لیے باعثِ طہارت اور اجر و ثواب ہی رہے۔“ [مسند أبي يعلى الموصلي/مسند جابر/حدیث: 1892]