سیدنا عبد اللہ بن عباس رضی اللہ عنہما سے روایت ہے کہ انہوں نے فرمایا: ”میں تقریباً ایک سال تک یہ ارادہ کرتا رہا کہ سیدنا عمر بن خطاب رضی اللہ عنہ سے ان دو خواتین کے بارے میں دریافت کروں جنہوں نے رسول اللہ صلی اللہ علیہ وسلم کے مقابلے میں ایک دوسرے کا ساتھ دیا تھا، مگر ان کے رعب و جلال کی وجہ سے مجھ میں سوال کرنے کی جرات نہیں ہوتی تھی؛ پھر جب ہم مقامِ مرّ ظہران میں تھے تو وہ وضو کے لیے تشریف لے گئے اور فرمایا: ”میرے لیے پانی کا ایک برتن لے آؤ“، میں ان کے پاس پانی لے کر حاضر ہوا تو عرض کی: اے امیر المؤمنین! وہ دو خواتین کون تھیں؟ ابھی میں نے اپنی بات مکمل بھی نہیں کی تھی کہ انہوں نے فوراً جواب دیا: ”وہ سیدہ عائشہ اور سیدہ حفصہ رضی اللہ عنہما تھیں“۔“ [مسند أبي يعلى الموصلي/مسند عمر بن الخطاب رضي الله عنه/حدیث: 197]