سیدنا جابر رضی اللہ عنہ سے روایت ہے کہ انہوں نے بیان فرمایا: ”ہم رسول اللہ صلی اللہ علیہ وسلم کے ساتھ ایک سفر میں تھے، آپ صلی اللہ علیہ وسلم نے مجھ سے میرا اونٹ خرید لیا اور مجھے مدینہ منورہ پہنچنے تک اس کی پشت پر سواری کی اجازت مرحمت فرمائی، جب ہم مدینہ پہنچ گئے تو میں وہ اونٹ لے کر آپ صلی اللہ علیہ وسلم کی خدمتِ اقدس میں حاضر ہوا اور اسے آپ صلی اللہ علیہ وسلم کے سپرد کر دیا، تب آپ صلی اللہ علیہ وسلم نے میرے لیے اس کی قیمت کی ادائیگی کا حکم فرمایا، پھر جب میں واپس پلٹا تو اچانک رسول اللہ صلی اللہ علیہ وسلم پیچھے سے آکر مجھ سے مل گئے، میں نے (اپنے جی میں) کہا کہ شاید اس سودے کے متعلق آپ صلی اللہ علیہ وسلم پر کوئی نئی بات ظاہر ہوئی ہے، مگر جب میں آپ صلی اللہ علیہ وسلم کے پاس حاضر ہوا تو آپ صلی اللہ علیہ وسلم نے وہ اونٹ مجھے ہی تھما دیا اور فرمایا: ”یہ تمہارا ہی ہے“، سیدنا جابر رضی اللہ عنہ فرماتے ہیں کہ پھر میرا گزر ایک یہودی شخص کے پاس سے ہوا تو میں نے اسے اس واقعے کی خبر دی، جس پر وہ حیرت زدہ ہو کر کہنے لگا کہ کیا واقعی انہوں نے تم سے اونٹ خریدا، تمہیں اس کی پوری قیمت بھی ادا کی اور پھر وہ اونٹ تمہیں ہبہ بھی کر دیا؟ میں نے جواب دیا: ”جی ہاں“۔“ [مسند أبي يعلى الموصلي/مسند جابر/حدیث: 2125]