سیدنا عمر رضی اللہ عنہ سے مروی ہے کہ سیدنا جبرائیل علیہ السلام نبی کریم صلی اللہ علیہ وسلم کی خدمتِ اقدس میں حاضر ہوئے اور دریافت کیا کہ ایمان کیا ہے؟ آپ صلی اللہ علیہ وسلم نے ارشاد فرمایا: ”ایمان یہ ہے کہ تم اللہ سبحانہ و تعالیٰ، اس کے فرشتوں، اس کی کتابوں، اس کے رسولوں اور یومِ آخرت پر ایمان لاؤ اور تقدیر کے خیر و شر پر (کامل یقین) رکھو۔“ اس پر سیدنا جبرائیل علیہ السلام نے کہا: ”آپ نے سچ فرمایا۔“ (سیدنا عمر رضی اللہ عنہ فرماتے ہیں کہ) ہمیں ان پر تعجب ہوا کہ وہ خود ہی آپ صلی اللہ علیہ وسلم سے سوال کرتے ہیں اور خود ہی آپ کے کلام کی تصدیق بھی کر رہے ہیں۔ پھر نبی کریم صلی اللہ علیہ وسلم نے ارشاد فرمایا: ”وہ جبرائیل تھے جو تمہارے پاس تمہیں تمہارا دین سکھانے کے لیے آئے تھے۔“ [مسند أبي يعلى الموصلي/مسند عمر بن الخطاب رضي الله عنه/حدیث: 242]