سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے مجھ سے فرمایا: ”ادھر آؤ اور میرے لیے (رمیِ جمار کے واسطے) کنکریاں چن دو۔“ سیدنا ابن عباس رضی اللہ عنہما بیان کرتے ہیں کہ میں نے آپ صلی اللہ علیہ وسلم کے لیے چٹکی سے پھینکنے کے برابر چھوٹی چھوٹی کنکریاں چن لیں، پھر جب میں نے وہ آپ صلی اللہ علیہ وسلم کے دستِ مبارک میں پیش کیں تو آپ صلی اللہ علیہ وسلم نے فرمایا: ”ہاں! بالکل ایسی ہی ہونی چاہئیں، اور تم لوگ دین میں غلو (بے جا سختی اور حد سے تجاوز) کرنے سے بچو، کیونکہ تم سے پہلے کی امتیں دین میں غلو کرنے کی وجہ سے ہی ہلاک ہوئیں۔“ [مسند أبي يعلى الموصلي/أول مسند ابن عباس/حدیث: 2472]