سیدنا ابن عباس رضی اللہ عنہما سے روایت ہے کہ ایک مرتبہ سیدنا جبرائیل علیہ السلام نبی کریم صلی اللہ علیہ وسلم کے پاس بیٹھے ہوئے تھے کہ اچانک انہوں نے اپنے اوپر سے ایک (دروازہ کھلنے کی) آواز سنی، تو انہوں نے اپنا سر اوپر اٹھایا اور عرض کیا: ”آسمان کا ایک ایسا دروازہ کھولا گیا ہے جو آج سے پہلے کبھی نہیں کھولا گیا تھا۔“ پھر وہاں سے ایک فرشتہ نازل ہوا اور اس نے عرض کیا: ”آپ کو ان دو نوروں کی خوشخبری ہو جو آپ کو عطا کیے گئے ہیں اور وہ آپ سے پہلے کسی نبی کو عطا نہیں کیے گئے: (ایک) سورہ فاتحہ اور (دوسری) سورہ بقرہ کی آخری آیات؛ آپ ان دونوں میں سے جو حرف بھی پڑھیں گے وہ (اس میں مذکور دعا و ثنا کے بدلے) آپ کو عطا کر دیا جائے گا۔“ [مسند أبي يعلى الموصلي/أول مسند ابن عباس/حدیث: 2488]