سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم وادیِ ازرق پر تشریف لائے تو دریافت فرمایا: ”یہ کون سی وادی ہے؟“ عرض کیا گیا: ”یہ وادیِ ازرق ہے۔“ آپ صلی اللہ علیہ وسلم نے ارشاد فرمایا: ”گویا میں سیدنا موسیٰ علیہ السلام کو دیکھ رہا ہوں کہ وہ اس وادی میں نشیب کی جانب اتر رہے ہیں اور بلند آواز سے تلبیہ پکارتے ہوئے اپنے رب کے حضور گڑگڑا رہے ہیں۔“ پھر آپ صلی اللہ علیہ وسلم مقامِ کداء کی گھاٹی سے گزرے اور دریافت فرمایا: ”یہ کیا ہے؟“ عرض کیا گیا: ”یہ کداء کی گھاٹی ہے۔“ آپ صلی اللہ علیہ وسلم نے ارشاد فرمایا: ”گویا میں سیدنا یونس بن متی علیہ السلام کو ایک مضبوط جسم والی سرخ اونٹنی پر سوار دیکھ رہا ہوں جس کی نکیل کھجور کے ریشوں سے بنی ہوئی ہے اور انہوں نے اون کا جبہ زیبِ تن کر رکھا ہے۔“ [مسند أبي يعلى الموصلي/أول مسند ابن عباس/حدیث: 2542]