سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم اپنی ازواجِ مطہرات کے پاس تشریف لائے جبکہ ایک حدی خوان (اونٹ ہانکنے والا) جنہیں سیدنا انجشہ رضی اللہ عنہ کہا جاتا تھا، ان کے اونٹوں کو ہانک رہا تھا، تو آپ صلی اللہ علیہ وسلم نے ارشاد فرمایا: «وَيْحَكَ يَا أَنْجَشَةُ، رُوَيْدَكَ سَوْقَكَ بِالْقَوَارِيرِ» ”اے انجشہ! تمہارا بھلا ہو، ان آبگینوں (یعنی خواتین) کو لے کر ذرا نرمی اور آہستہ روی سے چلو۔“ ابوقلابہ رحمہ اللہ بیان کرتے ہیں کہ ”رسول اللہ صلی اللہ علیہ وسلم نے ایک ایسا کلمہ ارشاد فرمایا کہ اگر تم میں سے کوئی ایسا کہتا تو تم اس پر عیب لگاتے (یعنی اسے معیوب جانتے، مگر یہ آپ صلی اللہ علیہ وسلم کی فصاحت و بلاغت تھی کہ خواتین کی نزاکت کے پیشِ نظر انہیں شیشے کے برتنوں سے تشبیہ دی)۔“ [مسند أبي يعلى الموصلي/مسند أنس بن مالك/حدیث: 2810]