سیدنا انس بن مالک رضی اللہ عنہ سے روایت ہے کہ اہل بادیہ (دیہات) میں سے ایک شخص نے نبی اللہ صلی اللہ علیہ وسلم سے سوال کیا — اور صحابہ کرام رضی اللہ عنہم کے مقابلے میں وہی لوگ آپ صلی اللہ علیہ وسلم سے سوال کرنے میں زیادہ جرات مند سمجھے جاتے تھے — پس اس نے عرض کی: ”اے اللہ کے رسول! قیامت کب برپا ہوگی؟“ آپ صلی اللہ علیہ وسلم نے دریافت فرمایا: ”تم نے اس کے لیے کیا تیاری کر رکھی ہے؟“ اس نے عرض کی: میں نے اس کے لیے کوئی بہت زیادہ (اعمال کی) تیاری تو نہیں کی، بجز اس کے کہ میں اللہ اور اس کے رسول سے محبت رکھتا ہوں، تو آپ صلی اللہ علیہ وسلم نے ارشاد فرمایا: ”پس بے شک تم اسی کے ساتھ ہو گے جس سے تم نے محبت کی“۔ سیدنا انس رضی اللہ عنہ فرماتے ہیں کہ میں نے مسلمانوں کو اسلام کی نعمت کے بعد کسی اور چیز پر اس قدر شدید خوش ہوتے ہوئے نہیں دیکھا جتنا وہ آپ صلی اللہ علیہ وسلم کے اس قول مبارک سے خوش ہوئے تھے۔ [مسند أبي يعلى الموصلي/مسند أنس بن مالك/حدیث: 3072]