سیدنا انس رضی اللہ عنہ سے روایت ہے کہ ”ایک شخص نبی کریم صلی اللہ علیہ وسلم کی خدمت میں حاضر ہوا جبکہ آپ صلی اللہ علیہ وسلم منبر پر تشریف فرما تھے، اس نے عرض کیا: ”اے اللہ کے رسول! اللہ تعالیٰ سے ہمارے لیے بارش کی دعا فرمائیے“، چنانچہ آپ صلی اللہ علیہ وسلم نے بارش کی دعا فرمائی؛ (سیدنا انس رضی اللہ عنہ فرماتے ہیں کہ) اس وقت آسمان پر بادل کا ایک ٹکڑا بھی نظر نہیں آ رہا تھا، پھر ایسی بارش ہوئی جو تھمنے کا نام نہ لیتی تھی یہاں تک کہ مدینہ کے دونوں اطراف (پتھریلے میدانوں) میں بارش برس رہی تھی، پھر جب اگلا جمعہ آیا تو وہی شخص یا کوئی دوسرا شخص آپ صلی اللہ علیہ وسلم کے سامنے کھڑا ہوا اور عرض کیا: ”اللہ تعالیٰ سے دعا فرمائیے کہ وہ اسے (بارش کو) اب ہم سے روک دے“، (سیدنا انس رضی اللہ عنہ بیان کرتے ہیں کہ) میں بادلوں کو دیکھ رہا تھا کہ وہ مدینہ کے گرد دائیں اور بائیں جانب پھٹ کر ہٹ رہے تھے اور شہر کے اندر بارش کا ایک قطرہ بھی نہیں گر رہا تھا“۔ [مسند أبي يعلى الموصلي/مسند أنس بن مالك/حدیث: 3104]