سیدنا انس بن مالک رضی اللہ عنہ سے روایت ہے کہ لوگوں نے رسول اللہ صلی اللہ علیہ وسلم سے (کثرت سے) سوالات کیے یہاں تک کہ انہوں نے آپ صلی اللہ علیہ وسلم کو اصرار کر کے تنگی میں ڈال دیا، تو آپ صلی اللہ علیہ وسلم نے (جلال کی کیفیت میں) ارشاد فرمایا: ”تم مجھ سے جس چیز کے بارے میں بھی سوال کرو گے میں اسے تمہارے لیے واضح کر دوں گا۔“ اس پر ایک ایسا شخص کھڑا ہوا جسے کسی سے جھگڑا ہونے کی صورت میں اس کے اصل باپ کے بجائے کسی اور کی طرف منسوب کیا جاتا تھا، اس نے دریافت کیا کہ اے اللہ کے رسول صلی اللہ علیہ وسلم ! میرا (حقیقی) باپ کون ہے؟ آپ صلی اللہ علیہ وسلم نے فرمایا: ”تمہارا باپ حذافہ ہے۔“ پھر سیدنا عمر بن خطاب رضی اللہ عنہ کھڑے ہوئے اور عرض کیا: «رَضِينَا بِاللَّهِ رَبًّا، وَبِالْإِسْلَامِ دِينًا، وَبِمُحَمَّدٍ رَسُولًا، نَعُوذُ بِاللَّهِ مِنْ شَرِّ الْفِتَنِ» ”ہم اللہ کے رب ہونے، اسلام کے دین ہونے اور محمد صلی اللہ علیہ وسلم کے رسول ہونے پر راضی ہوئے، اور ہم فتنوں کے شر سے اللہ کی پناہ مانگتے ہیں۔“ راوی کہتے ہیں کہ اس کے بعد رسول اللہ صلی اللہ علیہ وسلم نے ارشاد فرمایا: ”میں نے خیر اور شر کے معاملے میں آج جیسا منظر کبھی نہیں دیکھا، بے شک میرے سامنے جنت اور دوزخ کی تمثیل پیش کی گئی (اور وہ مجھے دکھلائی گئیں)۔“ [مسند أبي يعلى الموصلي/مسند أنس بن مالك/حدیث: 3134]