سیدنا انس رضی اللہ عنہ سے روایت ہے کہ سیدہ ام سلیم رضی اللہ عنہا نے اللہ کے نبی صلی اللہ علیہ وسلم سے اس عورت کے متعلق سوال کیا جو خواب میں وہی کچھ دیکھتی ہے جو ایک مرد دیکھتا ہے (یعنی احتلام)، تو اللہ کے نبی صلی اللہ علیہ وسلم نے ارشاد فرمایا: ”جب وہ اپنے خواب میں ایسا منظر دیکھے تو اسے غسل کر لینا چاہیے۔“ سیدہ ام سلیم رضی اللہ عنہا کہتی ہیں کہ مجھے اس بات پر حیا محسوس ہوئی تو میں نے عرض کی: کیا واقعی ایسا (عورتوں کے ساتھ بھی) ہوتا ہے؟ تو اللہ کے نبی صلی اللہ علیہ وسلم نے ارشاد فرمایا: ”ہاں، (اگر ایسا نہ ہو) تو پھر مشابہت کہاں سے آتی ہے؟ یقیناً مرد کا مادہ منویہ گاڑھا اور سفید ہوتا ہے جبکہ عورت کا مادہ زرد اور پتلا ہوتا ہے، پس ان دونوں میں سے جو بھی غالب آ جائے یا سبقت لے جائے، مشابہت اسی کے مطابق ہو جاتی ہے۔“ [مسند أبي يعلى الموصلي/مسند أنس بن مالك/حدیث: 3164]