سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم سیدہ عائشہ رضی اللہ عنہا کے گھر میں تشریف فرما تھے اور آپ کے چند صحابہ رضی اللہ عنہم کھانے کا انتظار کر رہے تھے، اتنے میں (راوی عمران رحمہ اللہ کہتے ہیں کہ میرا غالب گمان ہے کہ وہ سیدہ حفصہ رضی اللہ عنہا تھیں) انہوں نے پہل کرتے ہوئے ثرید سے بھرا ہوا ایک پیالہ بھیجا، سیدہ عائشہ رضی اللہ عنہا باہر تشریف لائیں اور اس پیالے کو پکڑا (یہ پردے کے احکامات نازل ہونے سے پہلے کا واقعہ ہے) اور اسے ضرب لگائی جس سے وہ ٹوٹ گیا، اللہ کے نبی صلی اللہ علیہ وسلم نے اسے اٹھایا اور اس کے ٹکڑوں کو سمیٹنے لگے - عمران رحمہ اللہ نے اپنے ہاتھ کے اشارے سے سمیٹنے کی کیفیت بیان کی - اور آپ صلی اللہ علیہ وسلم نے فرمایا: ”تم سب کھاؤ، تمہاری ماں کو غیرت آگئی ہے“، پھر جب آپ صلی اللہ علیہ وسلم کھانے سے فارغ ہوئے تو صحیح پیالہ سیدہ حفصہ رضی اللہ عنہا کی جانب بھیج دیا اور ٹوٹا ہوا پیالہ سیدہ عائشہ رضی اللہ عنہا کے پاس ہی رہنے دیا، چنانچہ یہ ایک شرعی فیصلہ اور ضابطہ بن گیا کہ: ”جو شخص کسی کی چیز توڑ دے تو وہ (ٹوٹی ہوئی شے) اسی کی ہوگی اور اس پر اس جیسی دوسری صحیح چیز کا بدلہ دینا لازم ہے“۔ [مسند أبي يعلى الموصلي/مسند أنس بن مالك/حدیث: 3339]