ثابت بنانی رحمہ اللہ بیان کرتے ہیں کہ میں نے سیدنا انس رضی اللہ عنہ سے کہا: ”اے انس! مجھے اس سب سے عجیب چیز کے بارے میں بتائیے جو آپ نے (نبی کریم صلی اللہ علیہ وسلم کے پاس) دیکھی ہو۔“ انہوں نے کہا: ”جی ہاں اے ثابت! میں نے رسول اللہ صلی اللہ علیہ وسلم کی دس سال تک خدمت کی مگر آپ صلی اللہ علیہ وسلم نے میری کسی ایسی بات پر کبھی ناگواری کا اظہار نہیں فرمایا جس میں مجھ سے کوئی کوتاہی ہوئی ہو۔ اور جب نبی اللہ صلی اللہ علیہ وسلم نے سیدہ زینب بنت جحش رضی اللہ عنہا سے نکاح کیا تو میری والدہ نے مجھ سے کہا: ”اے انس! رسول اللہ صلی اللہ علیہ وسلم کی آج صبح شادی ہوئی ہے اور مجھے معلوم نہیں کہ آپ صلی اللہ علیہ وسلم کے پاس صبح کے کھانے کے لیے کچھ ہے یا نہیں؟ لہٰذا وہ چمڑے کا برتن (کپہ) لے آؤ۔“ میں وہ برتن اور کچھ کھجوریں لے آیا، تو انہوں نے اس سے ملیدہ (حیص) تیار کیا اور کہا: ”اے انس! اسے لے کر نبی اللہ صلی اللہ علیہ وسلم اور ان کی اہلیہ کے پاس جاؤ۔“ چنانچہ جب میں پتھر کے ایک پیالے میں وہ ملیدہ لے کر نبی اللہ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے فرمایا: ”اسے گھر کے ایک گوشے میں رکھ دو، اور میرے پاس ابوبکر، عمر، علی اور عثمان (رضی اللہ عنہم) کو بلا لاؤ، نیز صحابہ کی ایک جماعت اور مسجد والوں کو بھی بلا لو اور راستے میں جو بھی ملے اسے بھی دعوت دے دو۔“ سیدنا انس رضی اللہ عنہ بیان کرتے ہیں کہ میں کھانے کی قلت اور لوگوں کی اس کثرت پر حیران ہو رہا تھا جنہیں بلانے کا مجھے حکم دیا گیا تھا، مگر میں نے آپ صلی اللہ علیہ وسلم کی نافرمانی کرنا پسند نہ کی یہاں تک کہ گھر اور حجرہ لوگوں سے بھر گیا۔ پھر آپ صلی اللہ علیہ وسلم نے دریافت فرمایا: ”اے انس! کیا اب بھی کوئی باقی نظر آتا ہے؟“ میں نے عرض کی: ”نہیں، اے اللہ کے نبی صلی اللہ علیہ وسلم !“ آپ صلی اللہ علیہ وسلم نے فرمایا: ”وہ پیالہ لے آؤ۔“ میں وہ پیالہ لے آیا اور آپ صلی اللہ علیہ وسلم کے سامنے رکھ دیا، آپ صلی اللہ علیہ وسلم نے اپنی تین انگلیاں اس پیالے میں ڈبوئیں تو وہ کھانا برکت سے بڑھنے اور بلند ہونے لگا، چنانچہ لوگ کھانا کھاتے اور نکلتے جاتے، یہاں تک کہ جب سب لوگ فارغ ہو گئے اور پیالے میں اب بھی اتنا ہی کھانا باقی تھا جتنا میں شروع میں لے کر آیا تھا۔ تب آپ صلی اللہ علیہ وسلم نے فرمایا: ”اسے زینب (رضی اللہ عنہا) کے سامنے رکھ دو۔“ پھر میں باہر نکل آیا اور کھجور کی شاخوں سے بنا دروازہ بند کر دیا۔ ثابت رحمہ اللہ کہتے ہیں کہ میں نے سیدنا انس رضی اللہ عنہ سے پوچھا: ”آپ کے خیال میں کتنے لوگ ہوں گے جنہوں نے اس پیالے سے کھانا کھایا؟“ انہوں نے جواب دیا: ”میرا اندازہ ہے کہ وہ اکہتر یا بہتر (71 یا 72) افراد تھے۔“ [مسند أبي يعلى الموصلي/مسند أنس بن مالك/حدیث: 3449]