مروان بن الحکم رحمہ اللہ سے روایت ہے کہ ہم سیدنا عثمان بن عفان رضی اللہ عنہ کے ہمراہ سفر کر رہے تھے کہ انہوں نے ایک شخص کو حج اور عمرہ دونوں کا ایک ساتھ تلبیہ پکارتے ہوئے سنا، تو آپ نے دریافت فرمایا: ”یہ کون ہے؟“ لوگوں نے عرض کیا: ”سیدنا علی رضی اللہ عنہ ہیں۔“ تب سیدنا عثمان رضی اللہ عنہ ان کے پاس آئے اور فرمایا: ”کیا آپ کو معلوم نہیں کہ میں نے اس سے منع کیا ہے؟“ سیدنا علی رضی اللہ عنہ نے ارشاد فرمایا: ”کیوں نہیں (مجھے علم ہے)، لیکن میں رسول اللہ صلی اللہ علیہ وسلم کے فرمان کو آپ کی بات کی وجہ سے چھوڑنے والا نہیں ہوں۔“ [مسند أبي يعلى الموصلي/مسند علي بن أبي طالب رضي الله عنه/حدیث: 349]