سیدنا انس رضی اللہ عنہ سے روایت ہے کہ سیدنا حارثہ رضی اللہ عنہ (میدانِ جنگ میں) صورتِ حال دیکھنے کے لیے نکلے تو انہیں ایک ناگہانی تیر آ لگا جس نے انہیں شہید کر دیا، اس پر ان کی والدہ سیدہ ام حارثہ رضی اللہ عنہا نے عرض کی: ”اے اللہ کے رسول صلی اللہ علیہ وسلم ! آپ میرے نزدیک حارثہ کے مقام و مرتبے سے بخوبی واقف ہیں، پس اگر وہ جنت میں ہے تو میں صبر کروں گی، وگرنہ آپ دیکھیں گے کہ میں (اپنے غم میں) کیا کرتی ہوں؟“ آپ صلی اللہ علیہ وسلم نے ارشاد فرمایا: ”اے ام حارثہ! وہ کوئی ایک جنت نہیں ہے بلکہ بہت سی جنتیں ہیں، اور یقیناً حارثہ ان میں سے سب سے افضل جنت میں ہے“ — یا آپ صلی اللہ علیہ وسلم نے فرمایا کہ: ”وہ فردوسِ اعلیٰ میں ہے“۔ راویِ حدیث یزید رحمہ اللہ فرماتے ہیں کہ مجھے (ان آخری الفاظ کے متعلق) شک ہے۔ [مسند أبي يعلى الموصلي/مسند أنس بن مالك/حدیث: 3500]