سیدنا انس بن مالک رضی اللہ عنہ سے روایت ہے کہ ایک مرتبہ میں اور رسول اللہ صلی اللہ علیہ وسلم مسجد سے باہر تشریف لا رہے تھے کہ مسجد کے بیرونی دروازے کے پاس ہمیں ایک شخص ملا اور اس نے دریافت کیا: ”اے اللہ کے رسول! قیامت کب برپا ہوگی؟“ رسول اللہ صلی اللہ علیہ وسلم نے اس سے پوچھا: ”تم نے اس کے لیے کیا تیاری کر رکھی ہے؟“ وہ شخص (یہ سن کر) گویا خاموش ہو کر ٹھہر گیا، پھر اس نے عرض کی: ”اے اللہ کے رسول! میں نے اس کے لیے بہت زیادہ نمازوں، روزوں اور صدقہ و خیرات کا کوئی بڑا سامان تو تیار نہیں کیا، البتہ میں اللہ اور اس کے رسول صلی اللہ علیہ وسلم سے محبت رکھتا ہوں“، اس پر آپ صلی اللہ علیہ وسلم نے ارشاد فرمایا: ”پھر تم اسی کے ساتھ ہو گے جس سے تم نے محبت کی ہوگی۔“ [مسند أبي يعلى الموصلي/مسند أنس بن مالك/حدیث: 3631]