سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم جب خیبر تشریف لائے تو آپ صلی اللہ علیہ وسلم نے فجر کی نماز غلس (اندھیرے) میں ادا کی، پھر آپ صلی اللہ علیہ وسلم اپنی سواری پر سوار ہوئے اور فرمایا: «اللَّهُ أَكْبَرُ، خَرِبَتْ خَيْبَرُ، إِنَّا إِذَا نَزَلْنَا بِسَاحَةِ قَوْمٍ ﴿فَسَاءَ صَبَاحُ الْمُنْذَرِينَ﴾ » ”اللہ سب سے بڑا ہے، خیبر تباہ و برباد ہو گیا، حقیقت یہ ہے کہ جب ہم کسی قوم کے میدان میں اترتے ہیں تو ﴿ان ڈرائے گئے لوگوں کی صبح بہت ہی بری ہوتی ہے﴾ “۔ راوی کہتے ہیں کہ خیبر کے لوگ گلیوں میں دوڑتے ہوئے نکلے اور وہ پکار رہے تھے: ”محمد ( صلی اللہ علیہ وسلم ) اور لشکرِ عظیم آ گیا ہے“۔ حماد رحمہ اللہ کہتے ہیں کہ ’الخمیس‘ سے مراد لشکر ہے۔ پھر رسول اللہ صلی اللہ علیہ وسلم ان پر غالب آ گئے، چنانچہ آپ صلی اللہ علیہ وسلم نے ان کے جنگجوؤں کو قتل کیا اور ان کے اہل و عیال کو قیدی بنا لیا۔ راوی کہتے ہیں کہ سیدہ صفیہ رضی اللہ عنہا (پہلے) سیدنا دحیہ کلبی رضی اللہ عنہ کے حصے میں آئی تھیں، پھر وہ بعد میں رسول اللہ صلی اللہ علیہ وسلم کے پاس آ گئیں تو آپ صلی اللہ علیہ وسلم نے ان سے نکاح کر لیا اور ان کی آزادی کو ہی ان کا حقِ مہر قرار دیا۔ اس پر عبدالعزیز رحمہ اللہ نے ثابت رحمہ اللہ سے پوچھا: ”اے ابو محمد! کیا آپ نے سیدنا انس رضی اللہ عنہ سے یہ دریافت کیا تھا کہ آپ صلی اللہ علیہ وسلم نے انہیں کیا مہر دیا تھا؟ اور کیا انہوں نے آپ کو یہ بتایا تھا کہ آپ صلی اللہ علیہ وسلم نے ان کا مہر ان کی اپنی ذات (آزادی) کو ہی بنایا تھا؟“ تو ثابت رحمہ اللہ (یہ سن کر) مسکرا دیے۔ [مسند أبي يعلى الموصلي/مسند أنس بن مالك/حدیث: 3932]