سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم کے عہدِ مبارک میں ایک شخص تھا جس کی عبادت گزاری اور زہد و مجاہدہ ہمیں بہت متاثر کرتا تھا، ہم نے رسول اللہ صلی اللہ علیہ وسلم کے سامنے اس کا تذکرہ اس کے نام سے کیا تو آپ صلی اللہ علیہ وسلم نے اسے نہ پہچانا، پھر ہم نے اس کے اوصاف بیان کیے تو بھی آپ صلی اللہ علیہ وسلم نے اسے نہ پہچانا، ابھی ہم اس کا تذکرہ کر ہی رہے تھے کہ اچانک وہ شخص نمودار ہوا، ہم نے عرض کی: ”یہ وہی شخص ہے“، آپ صلی اللہ علیہ وسلم نے فرمایا: ”تم مجھے ایسے شخص کے بارے میں بتا رہے ہو جس کے چہرے پر شیطان کا ایک اثر (تاریکی) ہے“، پھر وہ شخص آگے بڑھا یہاں تک کہ ان کے پاس آ کر کھڑا ہو گیا مگر اس نے سلام نہ کیا، رسول اللہ صلی اللہ علیہ وسلم نے اس سے دریافت فرمایا: ”میں تجھے اللہ کا واسطہ دے کر پوچھتا ہوں، کیا جب تو اس مجلس کے پاس آ کر کھڑا ہوا تو تو نے (اپنے جی میں) یہ نہیں کہا تھا کہ اس پوری قوم میں کوئی بھی مجھ سے بہتر یا افضل نہیں ہے؟“، اس نے جواب دیا: «اللَّهُمَّ نَعَمْ» ”اے اللہ! ہاں (میں نے یہی کہا تھا)“، پھر وہ مسجد میں داخل ہو کر نماز پڑھنے لگا، رسول اللہ صلی اللہ علیہ وسلم نے فرمایا: ”اس شخص کو کون قتل کرے گا؟“، سیدنا ابوبکر صدیق رضی اللہ عنہ نے عرض کی: ”میں“، وہ اس کے پاس گئے تو اسے نماز پڑھتے ہوئے پایا اور (اپنے جی میں) کہا: «سُبْحَانَ اللَّهِ» ”اللہ پاک ہے“، کیا میں ایسے شخص کو قتل کر دوں جو نماز پڑھ رہا ہے حالانکہ رسول اللہ صلی اللہ علیہ وسلم نے نمازیوں کو مارنے سے منع فرمایا ہے؟ چنانچہ وہ واپس آگئے، رسول اللہ صلی اللہ علیہ وسلم نے دریافت فرمایا: ”تم نے کیا کیا؟“، انہوں نے عرض کی: ”میں نے اسے نماز پڑھتے ہوئے قتل کرنا ناپسند کیا کیونکہ آپ صلی اللہ علیہ وسلم نے نمازیوں کو مارنے سے منع فرمایا ہے“، آپ صلی اللہ علیہ وسلم نے پھر پوچھا: ”اس شخص کو کون قتل کرے گا؟“، سیدنا عمر فاروق رضی اللہ عنہ نے عرض کی: ”میں“، وہ اندر گئے تو اسے سجدے کی حالت میں پایا، سیدنا عمر رضی اللہ عنہ نے سوچا کہ سیدنا ابوبکر صدیق رضی اللہ عنہ مجھ سے بہتر ہیں (جب انہوں نے اسے چھوڑ دیا تو میں کیسے قتل کروں) چنانچہ وہ بھی واپس آگئے، رسول اللہ صلی اللہ علیہ وسلم نے پوچھا: ”کیا ہوا؟“، انہوں نے عرض کی: ”میں نے اسے اللہ کے حضور سر بسجود پایا تو اسے قتل کرنا گوارا نہ کیا“، آپ صلی اللہ علیہ وسلم نے پھر فرمایا: ”اس شخص کو کون قتل کرے گا؟“، سیدنا علی بن ابی طالب رضی اللہ عنہ نے عرض کی: ”میں“، آپ صلی اللہ علیہ وسلم نے فرمایا: ”ہاں تم ہی (اسے قتل کرو گے) اگر تم اسے پا لو“، سیدنا علی رضی اللہ عنہ اندر گئے تو وہ جا چکا تھا، وہ رسول اللہ صلی اللہ علیہ وسلم کی خدمت میں واپس آئے تو آپ صلی اللہ علیہ وسلم نے پوچھا: ”کیا ہوا؟“، انہوں نے عرض کی: ”وہ تو نکل چکا ہے“، اس پر آپ صلی اللہ علیہ وسلم نے ارشاد فرمایا: ”اگر اسے قتل کر دیا جاتا تو میری امت کے دو افراد میں بھی کبھی اختلاف نہ ہوتا، یہ (فتنہ) ان کے اول سے لے کر آخر تک چلتا“۔ موسیٰ (راوی) کہتے ہیں کہ میں نے محمد بن کعب رحمہ اللہ کو یہ کہتے ہوئے سنا کہ: ”یہ وہی شخص تھا جسے بعد میں سیدنا علی رضی اللہ عنہ نے قتل کیا یعنی ذوالثدیہ (خوارج کا سردار)“۔ [مسند أبي يعلى الموصلي/مسند أنس بن مالك/حدیث: 4143]