عیسیٰ بن صدقہ رحمہ اللہ بیان کرتے ہیں کہ میں اپنے والد کے ہمراہ سیدنا انس بن مالک رضی اللہ عنہ کی خدمت میں حاضر ہوا اور ہم نے ان سے عرض کی کہ ہمیں کوئی ایسی حدیث سنائیے جس سے اللہ تعالیٰ ہمیں نفع پہنچائے، تو میں نے سیدنا انس بن مالک رضی اللہ عنہ کو یہ فرماتے ہوئے سنا کہ ”تم میں سے جو اس بات کی قدرت رکھتا ہو کہ وہ اس حال میں فوت ہو کہ اس پر کسی کا قرض نہ ہو تو اسے ضرور ایسا کرنا چاہیے، کیونکہ میں نے اللہ کے نبی صلی اللہ علیہ وسلم کو دیکھا کہ آپ کے پاس ایک شخص کا جنازہ لایا گیا جس پر قرض تھا، تو آپ صلی اللہ علیہ وسلم نے ارشاد فرمایا: ”میں اس پر اس وقت تک نماز نہیں پڑھوں گا جب تک کہ تم اس کے قرض کی ضمانت نہ دے دو، کیونکہ میرا اس پر نماز پڑھنا اس کے لیے نفع بخش ہے“، چنانچہ جب لوگوں نے اس کے قرض کی ضمانت نہ دی تو آپ صلی اللہ علیہ وسلم نے اس کی نمازِ جنازہ نہیں پڑھائی اور ارشاد فرمایا: ”بے شک وہ اپنی قبر میں (قرض کے بدلے) مرہون (گروی یا مقید) ہے“۔“ [مسند أبي يعلى الموصلي/مسند أنس بن مالك/حدیث: 4244]