سیدنا انس بن مالک رضی اللہ عنہ سے روایت ہے کہ جب نبی کریم صلی اللہ علیہ وسلم نے اپنی ایک زوجہ مطہرہ کے ساتھ شبِ عروسی گزاری تو سیدہ ام سلیم رضی اللہ عنہا نے آپ صلی اللہ علیہ وسلم کے لیے 'حیس' (کھجور، پنیر اور گھی سے تیار کردہ کھانا) تیار کیا اور اسے ایک برتن میں رکھ کر مجھ سے فرمایا: ”یہ رسول اللہ صلی اللہ علیہ وسلم کی خدمت میں لے جاؤ اور انہیں ہماری طرف سے «السَّلَامُ» ”سلام“ عرض کرنا اور بتانا کہ یہ ہماری جانب سے آپ کے لیے ایک معمولی سا ہدیہ ہے“، سیدنا انس رضی اللہ عنہ بیان کرتے ہیں کہ ان دنوں لوگ سخت معاشی تنگی اور مشقت کا شکار تھے، کہتے ہیں کہ میں وہ کھانا لے کر رسول اللہ صلی اللہ علیہ وسلم کی خدمتِ اقدس میں حاضر ہوا اور عرض کی: ”یا رسول اللہ! سیدہ ام سلیم رضی اللہ عنہا نے یہ ہدیہ آپ کی طرف بھیجا ہے، وہ آپ کو «السَّلَامُ» ”سلام“ کہتی ہیں اور عرض گزار ہیں کہ یہ ہماری طرف سے آپ کے لیے ایک حقیر سا نذرانہ ہے“، آپ صلی اللہ علیہ وسلم نے اس (کھانے) کی طرف دیکھا اور فرمایا: ”اسے رکھ دو“، میں نے اسے رکھ دیا، پھر نبی کریم صلی اللہ علیہ وسلم نے مجھ سے ارشاد فرمایا: ”جاؤ اور فلاں فلاں کو بلا لاؤ“، یہاں تک کہ آپ صلی اللہ علیہ وسلم نے بہت سے لوگوں کے نام لیے اور (یہ بھی فرمایا کہ) ”جو بھی تمہیں ملے اسے دعوت دے دو“، سیدنا انس رضی اللہ عنہ کہتے ہیں کہ جب میں (لوگوں کو لے کر) واپس آیا تو گھر، صفہ اور حجرہ سب لوگوں سے بھر چکے تھے۔ [مسند أبي يعلى الموصلي/مسند أنس بن مالك/حدیث: 4356]