سیدہ عائشہ رضی اللہ عنہا سے روایت ہے کہ سیدہ ام حبیبہ بنت جحش رضی اللہ عنہا، جنہیں سات سال تک استحاضہ (خونِ حیض کے علاوہ جاری رہنے والا خون) کا مرض رہا، رسول اللہ صلی اللہ علیہ وسلم کی خدمتِ اقدس میں حاضر ہوئیں اور آپ صلی اللہ علیہ وسلم سے اس کی شکایت کرتے ہوئے شرعی حکم دریافت کیا، تو آپ صلی اللہ علیہ وسلم نے ارشاد فرمایا: ”یہ حیض نہیں ہے بلکہ یہ تو ایک رگ (کا خون) ہے، لہٰذا تم غسل کرو اور پھر نماز ادا کرو۔“ زہری رحمہ اللہ بیان کرتے ہیں کہ وہ ہر نماز کے لیے غسل کیا کرتی تھیں اور (غسل کے لیے) جب وہ ٹب میں بیٹھتی تھیں تو خون کی سرخی پانی پر غالب آ جاتی تھی، پھر وہ نماز ادا کرتی تھیں۔ [مسند أبي يعلى الموصلي/مسند عائشة/حدیث: 4410]